Олунньу 13 күнүгэр СӨ Бырабыыталыстыбатын ситэриилээх былааһын отчуоттуур үһүс бөлөҕө Туойдаах уонна Хадан нэһилиэктэригэр үлэлээтэ. Үһүс бөлөҕү СӨ үбүн миниистирин бастакы солбуйааччыта Иван Алексеев, Сунтаар улууһун баһылыгын экэниэмикэҕэ уонна стратегическай былааннааһыҥҥа солбуйааччыта Борис Васильев салайан илдьэ сылдьаллар.

Олохтоохтор кулууп дьиэни толору мустан СӨ Бырабыыталыстыбатын ааспыт сылга ыыппыт үлэтин - хамнаһын отчуотун сэҥээрэн иһиттилэр. Саамай долгутар боппуруостарынан сыана үрдээһинэ, бэйдиэ сылдьар ыттар, мелиорация, суол, бензин сыаната үрдээһинэ, оскуола-саад тутуута, нэһилиэнньэҕэ ититиини киллэрии, миграннары хонтуруоллааһын, экология, атомнай станция тутуута буолла. Бэриллибит ыйытыктарга чопчу хоруйдар бэрилиннилэр.

Олохтоохтор отчуоттан астыммыттарын уонна үрдүк сыанабылы биэрэллэрин туһунан үтүө баҕа санааларын эттилэр.Бырабыыталыстыба кэлэн нэһилиэнньэни кытта көрсөн отчуоттаан баралларын сэргииллэрин, бырабыыталыстыба үлэтин биһирииллэрин туһунан санааларын уонна сыанабылларын тиэртилэр.

@suntaar_sonunnara улуус хаһыат матырыйаалынан бэлэмнэннэ.
@ulusmedia