МАЙАЛАР ЛИЦЕЙ САҤА ДЬИЭТИН ТУТУЛЛУУТУН ТҮРГЭТЭТЭРИ, ӨРӨСПҮҮБҮЛҮКЭТЭЭҔИ СУОЛЛАРЫ САЛГЫЫ ОҤОРУУНУ, КИРДЭЭХ УУНУ ЫРААСТЫЫР УОННА КЫТААНАХ БӨҔҮ УМАТАР ЫСТААНСЫЙАЛАР ТУТУЛЛУУЛАРЫН ТУРУОРСАЛЛАР

Саха Өрөспүүбүлүкэтин үп миниистирэ Валерий Жондоров салайааччылаах Саха Өрөспүүбүлүкэтин ситэриилээх былааһын ааспыт сыллааҕы үлэтин түмүгүнэн отчуоттуур бөлөҕө улууспут 29 нэһилиэгин кэрийэн, бүгүн, олунньу 20 күнүгэр, Майа сэлиэнньэтигэр түмүктүүр улахан отчуоту туруорда. 

Д.Ф. Ходулов аатынан Култуура киинигэр бырабыыталыстыба отчуота аан маҥнай ыытыллыбыта үөрүүлээх буолла, барыта 131 киһи кэлэн иһиттэ. Майа сэлиэнньэтин баһылыга Алексей Неустроев киирии тылынан аста. Ааспыт сыллардааҕы бырабыыталыстыба үлэтин түмүгүнэн үп миниистирэ Валерий Жондоров отчуоттаата. Улууспут баһылыга Дмитрий Тихонов, туһааннаах салалталар, тэрилтэлэр салайааччылара кыттыыны ыллылар.

Сирэй көрсөн олорон отчуот ыытыллыбытаҕа икки сылтан орто, ол да иһин олохтоохтор ыйытыылара, туруорсуулара үгүс. 

Тутуу эйгэтигэр туруорсуулар:

- И.Г. Тимофеев аатынан лицей дьиэтин тутуллуутун бырайыагын 2024 сылга бырагыраамаҕа киллэриини;
- “Манчаары” аатынан спорт комплекс саҥа дьиэтин тутууну;
- Сылы төгүрүччү үлэлиир сабыылаах хоккейдыыр корт тутуллуутун;
- Кирдээх ууну ыраастыыр ыстаансыйаны тутууну;
- Кытаанах бөҕү уматар собуоту тутууну;
- “Амма” өрөспүүбүлүкэ таһымнаах суолу салгыы оҥорууну; 
- Герой Попов аатынан уулусса устун дьон хаамар суолун оҥорууну;
- “Мүрү” айан суол аспаалланарын, сыыры тахсар анал кирилиэс оҥоһуллуутун туруорустулар.

Олохтоохтор санааларын хото этэн, араас эйгэҕэ этиилэри киллэрдилэр:

- Эдэр дьону сүөһү, сылгы иитиитигэр сыһыарар инниттэн сылгыһыттары табаһыттар статустарыгар тэҥнииргэ;
- Сүөһүнү тастан атыылаһан аҕаларга субсидияны эбии көрүүгэ;
- Сылгы базатын нэһилиэктэн тэйиччи тутуллуохтаах нуорматыгар биһиги улуус территориябыт эппиэттээбэтинэн ирдэбилгэ уларытыыны киллэриигэ; 
- Сылгыһыт күрэҕэр хамаанда састаабыгар оҕо кыттыытын киллэриигэ;
- Сылгыга көрүллэр субсидия эрдэлээн кэлэрин ситиһиини;
- Үүт харчытын үрдэтиигэ;
- Бөрөнү бултааһыҥҥа өрөспүүбүлүкэ таһымыгар анал сокуону ылыныыны;
- Өртөөһүн боппуруоһун хос көрөргө;
- Уһуйааччы уонна аҕа сүбэһит сылынан тыа хаһаайыстыбатын уонна тутуу эйгэтигэр үлэлии сыльдьар настаабынньыктары болҕомтоҕо ылыыга;
- Анал байыаннай дьайыыларга кыттыбыт дьону толору хааччыллыылаах дьиэнэн хааччыйар туһунан дьаһал тахсарын көҕүлүүргэ;
-Анал байыаннай дьайыыларга кыттар дьоҥҥо уонна кинилэр дьиэ кэргэттэригэр көрүллэр чэпчэтиилэр салгыы үлэлииллэригэр;
- Майаҕа “Илин Эҥэр” маҕаһыыҥҥа арыгыны атыылыыр отделын сабарга; 
- “Якутия” ФАПК аһыы утахтара сахалыы ааттанан тахсалларын бобууга;
- Чечня сэриитигэр сылдьыбыт дьоҥҥо көрүллэр көмө харчы үрдүүрүгэр;
- Тыыл бэтэрээннэригэр уонна сэрии сылын оҕолоругар болҕомтону үрдэтэргэ;
- Хаарбах 60 кыбартыыралаах дьиэ көтүрүллүүтүгэр көмө көрүллэригэр;
- “Экологические системы Якутии” ХЭТ үлэтиттэн тахсан, улууска олохтоох тэрилтэ дьарыктанар буолуутугар;
- Маамыкааҥҥа 90 дьиэлээх кыбаарталга гаас ситимэ тардыллыытын уонна элбэх оҕолооҕунан бэриллибит 180 учаастак баар  ХДСУ кыбаарталыгар инфраструктурата тардыллыытын бырагырымааҕа киллэттэрэргэ;
- ТОС-тар кыттар куонкурустарыгар ирдэбиллэргэ уларыйалар киирэллэригэр; 
- Чааһынай дьиэлээхтэргэ хапытаалынай өрөмүөҥҥэ субсидия көрүллүүтүгэр;
- “Аллараа Бэстээх-Дьокуускай” хайысханан “Ирбис” өҥөтүн сыанатын хонтуруоллуурга 
этиилэрин киллэрдилэр.

Маны таһынан тымныы кыһыннаах дойдуга олорорбутунан, улахан уйуктаах массыыналар, автобустар турбатын үөһэ олордору ирдиир ньыманы, химическэй собуот тутуллуута дойду ханнык эрэгийиэнигэр тутуллара былааннанарын, оскуолаларга саха тылын үөрэтии чааһын, тэйиччиттэн үөрэтии (дистанционнай) салгыы хайдах барыаҕын, өрөспүүбүлүкэ үрдүнэн хас улуус  телемедицинаны туһанарын, биэнсийэ кээмэйин, бырабыыталыстыба аһымал аахсыйаларга төһө кыттарын, “балбаах сокуонун” барыла төһө үөрэтиллибитин, Өлүөнэ Эбэни туоруур муостаны тутуу бырайыагын,  Майаҕа балыыһа тутуллуутун былаана ханнык түһүмэххэ сылдьарын, муниципальнай сулууспалаахтар хамнастара үрдүөн сөбүн, эдэр ыалы дьиэнэн хааччыйыы бырагырааманан көрүллэр субсидия үрдүүр кыахтааҕын, “Сардаҥа” түөлбэҕэ чааһынай дьиэлээхтэргэ хапытаалынай өрөмүөн ыытылларыгар көмө оҥоһуллуон сөбүн, “Лесопуун” түөлбэ Сэргэлээх, Сосновай, Таежнай уулуссаларга уонна Восточнай переулокка барыта 31 чааһынай олбуор иһигэр турар уот остуолбаларын уулуссаҕа таһаартарары, саҥа трансформатор турар кыахтааҕын,   Гимназическай, Гаврил Колесов, В.Скрябин ааттарынан түргэн интернет ситимэ хаһан тардыллыаҕын туоһулаһан ыйыттылар.

Түмүккэ олохтоохтор өрөспүүбүлүкэ бырабыыталыстыбатын отчуотун ылынан үчүгэйинэн сыаналаатылар итиэннэ сылтан сыл бары эйгэҕэ биллэр-көстөр үлэлэр ыытыллалларыттан астыналларын, махтаналларын бэлиэтээтилэр.

Мэҥэ Хаҥалас улууһун дьаһалтатын пресс-сулууспата.